சென்னை, பெருநகர காவலில் பணிபுரிந்து வந்த நுண்ணறிவுப்பிரிவு மூத்த மேலாளர் மோகன், 1 கண்காணிப்பாளர், 14காவல் உதவி ஆய்வாளர்கள் மற்றும் 10 சிறப்பு காவல் உதவி ஆய்வாளர்கள் என மொத்தம் 26 காவல் அலுவலர்கள் இன்று (31.07.2024) பணி ஓய்வு பெறுகின்றனர்.
இதனையொட்டி, இன்று (31.07.2024) மதியம், வேப்பேரி, சென்னை பெருநகர காவல் ஆணையரகத்தில் நடைபெற்ற பணி நிறைவு விழாவில், சென்னை பெருநகர காவல் ஆணையாளர் A.அருண், இ.கா.ப., அவர்கள், சென்னை பெருநகர காவலில் பணிபுரிந்து ஓய்வு பெறுகின்ற 26 காவல் அலுவலர்கள் மற்றும் அமைச்சுப்பணியாளர்கள், சுமார் 25 ஆண்டுகள் முதல் 39 ஆண்டுகள் சிறப்பாக பணிபுரிந்ததை பாராட்டி, தமிழக காவல்துறைக்கும், சென்னை பெருநகர காவல்துறைக்கும் பெருமை சேர்த்ததை நினைவு கூர்ந்து, சால்வை மற்றும் மாலை அணிவித்து பாராட்டி, சான்றிதழ்கள் வழங்கினார்.
காவல் ஆணையாளர் அவர்கள், ஓய்வு பெற்ற காவல் குடும்பத்தினரிடம், காவல்துறைக்கு ஒத்துழைப்பு அளித்தமைக்காக நன்றி தெரிவித்தார். பணி ஓய்வு பெற்ற காவல் அலுவலர்கள் தங்களது உடம்பையும், குடும்பத்தையும் பேணி காக்க வேண்டும் என அறிவுறுத்தினார். மேலும், ஏதேனும் உதவிகள் தேவைப்பட்டாலோ அல்லது குறைகள் தெரிவிக்க விரும்பினாலோ தன்னை நேரில் சந்தித்து முறையிடலாம் என காவல் ஆணையாளர் அவர்கள் ஓய்வு பெற்ற காவல் அலுவலர்களிடம் தெரிவித்தார். மேலும் பணி ஓய்வு பெற்ற காவல் அலுவலர்களுக்கு ஓய்வு ஊதிய பலன்களை விரைந்து வழங்க வேண்டும் என சம்பந்தப்பட்ட காவல் அதிகாரிகளுக்கு உத்தரவிட்டார்.
இந்நிகழ்ச்சியில், காவல் கூடுதல் ஆணையாளர் (தலைமையிடம்) கபில்குமார் சி சரட்கர், இ.கா.ப., இணை ஆணையாளர் (தலைமையிடம்) A.கயல்விழி, இ.கா.ப, பெண்கள் மற்றும் குழந்தைகளுக்கு எதிரான குற்றத்தடுப்பு பிரிவு (CAWC) துணை ஆணையாளர் வனிதா, (பொறுப்பு தலைமையிடம் / நிர்வாகம்) காவல் அதிகாரிகள் மற்றும் ஓய்வு பெற்ற காவல் அலுவலர்களின் குடும்பத்தினர் கலந்து கொண்டனர்.
