திருச்சி மாவட்ட காவல் அலுவலகத்தில் இன்று நடைபெற்ற நிகழ்வில், திருச்சி மாவட்ட காவல் கண்காணிப்பாளர் செ. செல்வநாகரெத்தினம், இ.கா.ப., அவர்கள், மாவட்டத்தில் புதிதாக வரப்பெற்ற 57 Body Worn Camera-க்களை இரு சக்கர மற்றும் நான்கு சக்கர ரோந்து வாகன காவலர்களுக்கு வழங்கி, முக்கிய அறிவுரைகளை வழங்கினார்.
இதன்படி, 44 இருசக்கர ரோந்து வாகனங்களுக்கும், 11 நான்கு சக்கர ரோந்து வாகனங்களுக்கும் இந்த கேமராக்கள் ஒதுக்கப்பட்டன. இதில், மூன்று வாகன ஓட்டுநர்களுக்கும் Body Worn Camera-கள் அணிவிக்கப்பட்டு, வாகனங்களை காவல் கண்காணிப்பாளர் அவர்கள் கொடியசைத்து செயல்பாட்டிற்கு கொண்டு வந்தார்.
பணிக்கு செல்லும் முன், ஒவ்வொரு காவலரும் தங்களது கேமரா போதுமான மின்னோட்டத்துடன் (charge) உள்ளது என்பதை உறுதிசெய்த பிறகே பணியில் ஈடுபட வேண்டும் என அவர் வலியுறுத்தினார். விசாரணை அல்லது தகவலுக்கு செல்வதற்கான நேரங்களில் கேமராவை இயக்கி சம்பவங்களை பதிவு செய்ய வேண்டியதையும், அந்த பதிவுகள் காவலர்களுக்கே பாதுகாப்பான ஆதாரமாக அமையும் என்றும் விளக்கியுள்ளார்.
மேலும், ஒவ்வொரு நாள் பணிமுடிவிலும் அந்த day’s footage-ஐ காவல் நிலைய கணினியில் பதிவிறக்கம் செய்ய வேண்டிய அவசியம் இருப்பதாகவும், இந்த கேமராக்கள் நெருக்கமான இடங்களில் நடக்கும் உரையாடல்களின் உண்மை நிலையை பின்னர் புரிந்துகொள்வதற்கும் வழிகாட்டும் கருவியாக அமையும் என்றும் கூறினார்.
Body Worn Camera-களை கவனமாக கையாள வேண்டியது மட்டுமல்லாமல், பொதுமக்களிடம் முறையான மரியாதையுடன் பேச்சு நடத்துவது என்பதிலும் காவலர்களுக்கு அறிவுறுத்தல் வழங்கப்பட்டது.
இத்தகைய புதிய தொழில்நுட்பங்களை பயன்படுத்துவதன் மூலம், மாவட்ட காவல் கட்டுப்பாட்டு அறையில் இருந்து நேரடியாக ரோந்து வாகனங்களின் இயக்கம் மற்றும் இருப்பிடங்களை கண்காணிக்க முடியும். இது சம்பவ இடத்திற்கு அருகிலுள்ள காவலர்களை உடனடியாக அனுப்பும் நடவடிக்கைக்கு பெரிதும் உதவியாக இருக்கும்.
இந்நிகழ்வின் போது, பொதுமக்கள் தங்களிடம் உள்ள தகவல்களை போலீசாரிடம் தெரிவிக்க விரும்பினால், திருச்சி மாவட்ட காவல் கண்காணிப்பாளர் செ. செல்வநாகரெத்தினம் அவர்களின் உதவி எண் 8939146100-க்கு தொடர்பு கொள்ளலாம் எனவும் அறிவிக்கப்பட்டது.
