மதுவும், போதைப்பொருள்களும், குட்காவும் சமூகத்திற்கு ஏற்படுத்தும் தீமைகள் குறித்து கடலூர் சாவடி செக் போஸ்ட் பகுதியில் விழிப்புணர்வு நிகழ்ச்சி நடத்தப்பட்டது. இந்த நிகழ்வுக்கு கடலூர் மாவட்ட மதுவிலக்கு அமலாக்க பிரிவு (PEW) துணை காவல் கண்காணிப்பாளர் (DSP) திரு. பார்த்திபன் தலைமையேற்று முக்கிய பயனுள்ள தகவல்களை வழங்கினார்.
டி.எஸ்.பி. திரு. பார்த்திபன் நிகழ்ச்சியை தொடங்கி வைத்து, மதுபானங்கள், போதைப்பொருள்கள் மற்றும் குட்கா போன்றவற்றின் உடல்நல பாதிப்புகள் மற்றும் சட்டப்பூர்வ விளைவுகள் குறித்து பொதுமக்களுக்கும், ஆட்டோ டிரைவர்கள் மற்றும் தினசரி கூலி தொழிலாளர்களுக்கும் விரிவாக விளக்கமளித்தார்.
அவர் தனது உரையில், “மதுவும் போதைப்பொருள்களும் ஒருவரின் உடல் ஆரோக்கியத்தையும், மனநிலையையும் பாதிக்க மட்டுமின்றி, குடும்ப வாழ்வையும் சீரழிக்கின்றன” எனக் கூறினார். மேலும், சாலைப் பாதுகாப்பு, போக்குவரத்து விதிமுறைகள் மற்றும் மதுபோதையில் வாகனம் செலுத்துவதன் ஆபத்துகள் குறித்தும் விழிப்புணர்வு ஏற்படுத்தினார்.
“சமூகத்தின் நலனுக்காக அனைவரும் ஒத்துழைத்து, போதைப்பொருள் பயன்பாட்டை முற்றிலும் தவிர்க்க வேண்டும்” என அவர் வலியுறுத்தினார்.
இந்நிகழ்வில் PEW ஆய்வாளர் திரு. பாலாஜி மற்றும் மற்ற மூன்று காவல்துறையினர் கலந்து கொண்டு, டி.எஸ்.பி. திரு. பார்த்திபனின் வழிகாட்டுதலின் கீழ் விழிப்புணர்வு ஏற்படுத்தினர்.
பொதுமக்கள், ஆட்டோ டிரைவர்கள் மற்றும் தொழிலாளர்கள் தங்களது சந்தேகங்களை கேட்டு, டி.எஸ்.பி. திரு. பார்த்திபனிடமிருந்து நேரடியாக விளக்கங்களை பெற்றனர். நிகழ்ச்சி முடிவில், “மதுவும் போதைப்பொருள்களும் இல்லாத சமுதாயத்தை உருவாக்குவதற்காக முழு மனதுடன் செயல்படுவோம்” என அனைவரும் உறுதி மொழி எடுத்தனர்.
“போதைப்பொருள் தடுப்பு மற்றும் மதுவிலக்கு தொடர்பான விழிப்புணர்வு நிகழ்ச்சிகள் தொடர்ந்து மாவட்டம் முழுவதும் மேற்கொள்ளப்படும்” என டி.எஸ்.பி. திரு. பார்த்திபன் உறுதிபடக் கூறினார்.
