அம்பாசமுத்திரத்தில் புதிய புறக்காவல் நிலையத்தை மாவட்ட காவல் கண்காணிப்பாளர் திறந்து வைத்தார்

அம்பாசமுத்திரம், 11 ஜனவரி 2025:
அம்பாசமுத்திரம் காவல் நிலைய எல்லைக்குட்பட்ட ராணி மேல்நிலைப்பள்ளி அருகே, காவல்துறையின் சார்பில் புதிதாக அமைக்கப்பட்ட புறக்காவல் நிலையத்தை திருநெல்வேலி மாவட்ட காவல் கண்காணிப்பாளர் திரு. N. சிலம்பரசன் இன்று (11.01.2025) ரிப்பன் வெட்டியும், குத்துவிளக்கேற்றியும் திறந்து வைத்தார்.

திறப்பு விழாவின்போது, அவர் புறக்காவல் நிலையத்தைக் காணொலி பார்வையிட்டு, காவலர்களுக்கு முக்கிய ஆலோசனைகளை வழங்கினார். இதன்போது, அவர் கூறியதாவது:
“பொதுமக்களின் நீண்ட நாள் கோரிக்கையை ஏற்று, மக்கள் பாதுகாப்பையும், பள்ளி மாணவர்களின் நலனையும் கருத்தில் கொண்டு இப்பகுதியில் புதிய புறக்காவல் நிலையம் அமைக்கப்பட்டுள்ளது. இது 24 மணிநேரமும் செயல்பட்டு, பொதுமக்கள் தங்கள் புகார்களை எளிதில் முன்வைத்து தீர்வுகளை பெறும் வகையில் செயல்படவுள்ளது,” எனத் தெரிவித்தார்.

இந்த நிகழ்ச்சியில் அம்பாசமுத்திரம் உட்கோட்ட துணை காவல் கண்காணிப்பாளர் திரு. சதீஷ்குமார், காவல் ஆய்வாளர் திரு. ரமேஷ் கண்ணன், உதவி ஆய்வாளர்கள் திரு. மேதாஜி சிதம்பரம், திரு. ஆனந்த பாலசுப்பிரமணியன் உள்ளிட்ட பல்வேறு காவல்துறை அதிகாரிகளும், பொதுமக்களும் கலந்து கொண்டனர்.