சிவகங்கை மாவட்டம், திருப்பத்தூர் உட்கோட்டம், திருக்கோஷ்டியூர் காவல் நிலைய சரகத்தில் உள்ள P. கருங்குளம் கிராமத்தில் இரண்டு பூட்டிய வீடுகளில் நிகழ்ந்த திருட்டு சம்பவத்தில் ஈடுபட்ட மூவரை போலீசார் கைது செய்து, திருடப்பட்ட வெள்ளிப் பொருட்கள் மற்றும் குற்றச்சம்பவத்திற்கு பயன்படுத்திய வாகனம், ஆயுதங்களை கைப்பற்றினர்.
திருட்டு சம்பவத்தின் பின்னணி
கருங்குளம் கிராமத்தைச் சேர்ந்த நாச்சியப்பன் (70) மற்றும் வயிரவன் (74) ஆகிய இருவரும் தற்போது சென்னையில் வசித்து வருகின்றனர். இவர்களுக்கு கருங்குளம் கிராமத்தில் பூர்வீக வீடுகள் உள்ளது. 22.02.2025 அன்று இரவு, மர்ம நபர்கள் இந்த இரண்டு வீடுகளின் பூட்டை உடைத்து, வீட்டில் இருந்த வெள்ளிப் பொருட்கள், காமாட்சி விளக்கு உள்ளிட்டவைகளை திருடிச் சென்றனர்.
இதுகுறித்து திருக்கோஷ்டியூர் காவல் நிலையத்தில் புகார் அளிக்கப்பட்டு, வழக்குப்பதிவு செய்யப்பட்டு விசாரணை தொடங்கப்பட்டது. கைரேகை நிபுணர்கள் வரவழைக்கப்பட்டு, போலீசார் பல்வேறு தடயங்களை ஆய்வு செய்தனர்.
குற்றவாளிகளை பிடிக்க காவல்துறை மேற்கொண்ட அதிரடி நடவடிக்கை
சம்பவம் தொடர்பாக மாவட்ட காவல் கண்காணிப்பாளர் ஆஷிஷ் ராவத், இ.கா.ப அவர்களின் உத்தரவின் பேரில், திருப்பத்தூர் துணை கண்காணிப்பாளர் அறிவுறுத்தலின்படி, திருக்கோஷ்டியூர் காவல் ஆய்வாளர் தலைமையில் சிறப்பு தனிப்படை அமைக்கப்பட்டது.
தொடர்ந்த விசாரணையில், திருட்டு சம்பவத்தில் ஈடுபட்டவர்கள் குறித்து முக்கிய தகவல்கள் கிடைத்தன. இதனைத்தொடர்ந்து, தனிப்படை அணி மேற்கொண்ட அதிரடி செயல்பாட்டில், திருட்டில் ஈடுபட்ட மூவரை கைது செய்ய முடிந்தது.
கைது செய்யப்பட்ட குற்றவாளிகள்
- சார்லஸ் @ சேசு அருள் (36) – திருப்புவனம், அகரம் சிலைமான் பகுதி
- கார்த்திகேயன் @ கார்த்தி (36) – வீரணன் மகன், திருப்புவனம்
- மாதேஸ்வரன் (37) – பாலசுப்பிரமணி மகன், நாமக்கல், ரெட்டிரோடு
களவு சொத்துக்கள் மீட்பு & வழக்கு நடவடிக்கை
விசாரணையின் போது, குற்றவாளிகள் திருட்டில் ஈடுபட்டதை ஒப்புக்கொண்டனர். அவர்களிடமிருந்து 3.717 கிலோ வெள்ளிப் பொருட்கள், திருட்டுக்கு பயன்படுத்தப்பட்ட இருசக்கர வாகனம் மற்றும் ஆயுதங்கள் கைப்பற்றப்பட்டன. கைது செய்யப்பட்ட மூவரும் நீதிமன்றக் காவலுக்கு அனுப்பப்பட்டனர்.
காவல்துறையின் எச்சரிக்கை
இதுபோன்ற திருட்டு சம்பவங்களில் ஈடுபடுபவர்களுக்கு எதிராக கடுமையான நடவடிக்கை எடுக்கப்படும் என்று மாவட்ட காவல் கண்காணிப்பாளர் ஆஷிஷ் ராவத், இ.கா.ப அவர்கள் எச்சரிக்கை விடுத்துள்ளார்.
