தாளமுத்துநகர் காவல் நிலைய எல்லைக்குட்பட்ட தாய்நகரில் நடைபெற்ற மாரியம்மன் கோவில் கொடை விழாவில் வைத்து (24.08.2023) மாவட்ட காவல்துறை சார்பாக ‘மாற்றத்தை தேடி” என்ற சமூக விழிப்புணர்வு கூட்டம் தூத்துக்குடி உட்கோட்ட காவல் துணை கண்காணிப்பாளர் சத்தியராஜ் முன்னிலையில் மாவட்ட காவல் கண்காணிப்பாளர் டாக்டர் எல். பாலாஜி சரவணன் அவர்கள் தலைமையில் நடைபெற்றது.
அப்போது மாவட்ட காவல் கண்காணிப்பாளர் அவர்கள் பேசுகையில், கிராமங்களில் எந்தவித சண்டை சச்சரவு இல்லாமல் மக்கள் அமைதியான முறையில் இருப்பதற்கும், குழந்தைகள் மற்றும் இளைஞர்கள் என யாரும் குற்ற செயல்களில் ஈடுபட்டு தங்களது எதிர்காலத்தை தொலைத்துவிடாமல் தூத்துக்குடி மாவட்டத்தை குற்றம்மில்லா மாவட்டமாக மாற்றுவதும் இந்த விழிப்புணர்வு நிகழ்ச்சியின் நோக்கம் ஆகும். தற்போது இளைஞர்கள் கஞ்சா போன்ற போதை பொருட்களுக்கு அடிமையாகி குற்ற செயல்களில் ஈடுபட்டு அவர்களது எதிர்காலத்தையே தொலைத்து விடுவதோடு மட்டுமல்லாமல் அவர்களது குடும்பபமும் பாதிப்படைகிறது. போதை பொருட்களை அதிகஅளவில் உபயோகப்படுத்துவதால் இளைஞர்கள் இளவயதிலேயே ஆண்மையை இழந்து வயதானவர்கள்போல உடல்நலக்குறைவு ஏற்பட்டு பாதிக்கப்படுகிறார்கள். ஆகவே உங்கள் ஊரில் உள்ள பெரியவர்களாகிய நீங்கள் கிராம இளைஞர்களுக்கு போதை பொருட்களை பயன்படுத்துவதால் ஏற்படும் விளைவுகள் குறித்து விழிப்புணர்வு ஏற்படுத்துங்கள். உங்கள் உறவினர்கள் மற்றும் நண்பர்களுக்கும் இதுகுறித்து விழிப்புணர்வு ஏற்படுத்துங்கள்.
கோபத்தினால் குற்ற செயலில் ஈடுபட்டு சிறை செல்பவனை விட, தனது குடும்பத்திற்காக தன்னை கட்டுப்படுத்தி பிறரிடம் அமைதியாகவும், ஒற்றுமையாகவும் இருப்பவன்தான் உண்மையான வீரன் ஆவான். கோபப்பட்டு குற்ற செயலில் ஈடுபடுவன் அவனது எதிர்காலத்தை இழப்பதோடு அவனது குடும்பமும் பாதிப்படையும். அதனால் பெற்றோர்கள் தங்களது குழந்தைகளுக்கு நேர்மறையான சிந்தனைகளை வளர்க்க கற்று கொடுங்கள். பழிக்குப்பழி எண்ணம் ஒரு குடும்பத்தை மட்டுமல்லாது ஒரு தலைமுறையை அழித்துவிடும். பழிக்குபழி என்ற எண்ணத்தை கைவிட்டு, ஜாதிய வேறுபாடுகளை களைந்து அனைவருடனும் ஒற்றுமையாக வாழ்ந்து இந்த சமுதாயத்தை நல்ல முன்னேற்ற பாதையில் கொண்டு செல்ல வேண்டும். இரு கிராமங்களில் வசிப்பவர்களுக்கிடையே ஏற்படும் தனிப்பட்ட பிரச்சினையை சாதி பிரச்சினையாகவோ, பொதுப்பிரச்சினையாகவோ ஆக்காமல் உடனடியாக காவல் நிலையத்திற்கு தெரிவித்து சுமூகமாக தீர்ப்பதற்கு முயல வேண்டும். உங்கள் ஒவ்வொருவருடைய மாற்றமும் சமுதாயத்திலும் நல்ல மாற்றத்தை கொண்டு வரும்.
தூத்துக்குடி மாவட்ட காவல்துறையினர் ‘மாற்றத்தை தேடி“ என்ற விழிப்புணர்வு நிகழ்ச்சி மூலமாக விழிப்புணர்வு ஏற்படுத்தியதன் பயனாக நம் மாவட்ட பொதுமக்கள் தாங்களாக முன்வந்து தங்கள் பகுதிகளில் உள்ள ஜாதிய அடையாளங்களை அழித்துள்ளது மிகவும் பாராட்டுகுரிய செயலாகும். நம்முடைய சந்ததிகளுக்கு நிம்மதியான மகிழ்ச்சியான சமுதாயத்தை உருவாக்கி கொடுப்பது நமது பொறுப்பாகும். அதனால் நாம் ஜாதிய வேறுபாடுகளை களைந்து அனைவரும் ஒன்று சேர்ந்து ஒற்றுமையாக இருந்து நல்ல சமுதாயத்தை உருவாக்க வேண்டும் என்று விழிப்புணர்வு ஏற்படுத்தி தனது உரையை நிறைவு செய்தார்.
அதனை தொடர்ந்து இந்நிகழ்ச்சியின் முக்கிய நிகழ்வாக மாவட்ட காவல் கண்காணிப்பாளர் டாக்டர் எல். பாலாஜி சரவணன் அவர்கள் தலைமையில் காவல்துறையினரின் முன்னிலையில் கீழ்கண்டவாறு உறுதிமொழி ஏற்கப்பட்டது. ‘நாம் நமக்காகவும் நம் சந்ததியினருக்காகவும் சாதி, மத வேற்றுமைகள் இல்லாத தூத்துக்குடி மாவட்டத்தை உருவாக்குவோம். எதிர்மறை சிந்தனைகளை களைந்து பழிக்குப்பழி என்ற எண்ணம் நீங்கி நற்சிந்தனைகளை வளர்த்து மகளிரையும் குழந்தைகளையும் மக்களையும் பாதுகாப்போம். எந்த சூழ்நிலையிலும் எக்காரணம் கொண்டும் கத்தி, அரிவாள் மற்றும் எந்த கொடிய ஆயுதங்களையும் பயன்படுத்த மாட்டோம்” என்னும் உறுதிமொழியை கூட்டத்தில் கலந்து கொண்ட பொதுமக்கள் அனைவரும் ஏற்று குற்றங்கள் இல்லாத தூத்துக்குடி மாவட்டத்தை உருவாக்குவோம் என்ற அடிப்படையில் உறுதிமொழி எடுத்துக் கொண்டனர். பின்னர் மாவட்ட காவல் கண்காணிப்பாளர் அவர்கள் முன்னிலையில் கீழஅழகாபுரி கிராம மக்கள் அப்பகுதியில் உள்ள ஜாதிய அடையாளங்களை தாமாக முன்வந்து வெள்ளைநிற பெயிண்டால் அழித்தனர்.
இந்த விழிப்புணர்வு நிகழ்ச்சிக்கான ஏற்பாடுகளை தூத்துக்குடி உட்கோட்ட காவல் துணை கண்காணிப்பாளர் சத்தியராஜ் தலைமையிலான தூத்துக்குடி உட்கோட்ட போலீசார் செய்திருந்தனர்.
இந்த விழிப்புணர்வு கூட்டத்தில் தாளமுத்துநகர் காவல் நிலைய ஆய்வாளர் மணிமாறன், உதவி ஆய்வாளர் திரு. முனியசாமி, தூத்துக்குடி உட்கோட்ட தனிப்பிரிவு உதவி ஆய்வாளர் சேகர் உட்பட காவல்துறையினர் மற்றும் பொதுமக்கள் பலர் கலந்து கொண்டனர்.
